Translated into Chungli Ao by Dr Asangba Tzüdir
Public Statement on Repatriation of Naga Ancestral Remains
FNR Lokti Sangdong
Okila
Forum for Naga Reconciliation (FNR), the Pitt Rivers Museum (PRM) aser Naga researchers University of Edinburgh aser University of Melbourne parnok lokteper koba Naga nunger tetsü tebu indang teret aser mangko tem Pitt Rivers Museum nung yua lir, iba atema tarütsü nung ya koda asunung ajungtsu ta asameyangtepa tongtepratepa aser shisadangteper.
Covid-19 alima ajonga wara mapang PRM ita pungo (5) shibang aser iba sülen September 22, 2020 nung lapokdangbo parnoki nisung teret aser nisung kü tema nung sayaa alibatem agizüka yua adok. Item ya British nungeri asen lima yimsüsüba mapang par limai bener aoba joko parnoki par Pitt Rivers museum nung ayuba indangji kanga shisadanga bilemdanger joko item nisung teret aser ku ya shir kin indang par kin den tongtepratepa meyipa agutsütsu mapa tajungba tenzükogo. Ina inyakyim nung asen Naga nunger indanga denssema lir, aser aji joko alima nüpurtem dang par museum nung yur sayua aliba joko itemji agizüker süngden nung yuadokogo. Tangya iba Pitt Rivers Museum, Oxford, UK nung anebalua ayuba Naga ancestral remains ajak agi 214 shi lira ser aji Naga nunger indang teret, aser ku aser teret enoka yangluba osettem lir .
Dr Dolly Kikon, Naga anthropologist, aser University of Melbourne nung shiba Associate Professor lir, lai PRM inyakyim ji The Guardian osang kaket nung züngshia Museum Director den tongtepratepa asen Naga nunger indang teret aser osettem indangji asüngdanga liasü. Iba sulen lai iba indang Forum for Naga Reconciliation den sensaksema liasü. Tatemnungbo FNR koba Reconciliation dak sendakba nung lenir sur talisa Naga yimden atema telongjem bener arutsüba mapa nung nokdaka ali iba yongji PRM ajanga FNR den tongtepratepa PRM nung yua aliba Naga nunger indang teret aser osettsüset balala (Repatriation of Naga ancestral Remains) indang inyakyim, koda asen limai bener arütsü aser koda iba ya putepshidaktsüba aser lokti ka aki tatalokbatem ajanga temolung yirua lir aji koda tanebtsüba bener arutsü item indang jembishinü tenzük.
Anungji, FNR aser PRM na tsüngta koba jembishinü tenzük iba nung ajemdaker, FNR ajanga Naga nunger lokti aser kin balala den tongtepratepa iba ‘Repatriation’ dak sendaka aliba mapa inyakyim, aser ken-o külemi jembishinua angatettsü merangdagi.
PRM ajanga FNR den külemi teka amteper inyaktsü tejangraba indang yamai ashihas expressed it is keen to work with FNR, “Onoki FNR ajanga Naga nunger dak sendakba nung ken-o aika – tanebtsüba, tatok agütsüba, longjemdaktsüba aser talisa aki tatalokba otsütem koba agi Naga nunger rongnung temolung tanü tashi korema yirua ali item indang nung FNR ajanga mapa tajung aika inyaka aliba yongji dang Repatriation mapa nungya-a FNR ji kanga tongtipang lir, aser iba ajanga Naga traditional elders, tanishirtem aser Naga kin aser Naga nunger telok balala nungi nüngtet den tarutsü nung item Naga nunger indang teret aser osettsüsettemji koda anebalutsü, aser meshirabangla taah a agütsütsüba tashing jembishinütsü atema.” PRM asameyang nung parnoki asen lokti balala nung lenir aser nüpurtem den lokteper aki mapang tatalokbatem ajanga koba tanu tashi temolung korema lir item indang temolung sadoksadoka angatepa aser jembitepa tangatettep aser taneptsüba ka adokdaktsütsüba nükjidong lir.
Inyakyonga aotsuba mapatemji – lokti den ajurua jembishinu akatsüba; museum nung yua aliba Naga nunger teretji shir kin mesura telok indang ta tesendaktep tanatiba bushia kibur kuma meshitsüba mapa; Naga nunger sobaliba telok balala nungi tebilembatem ajonga bendentsüba; aser Naga nunger telok balala nungi tebilemba bendenba nung ajemdaker PRM dangi Official sua meshitsuba; Naga kinten PRM-i oa PRM nung yua aliba terettemhi (ancestral remains) shisadanga repranga, jembishinü katepa aser itemji koda bener arutsü.
Inyakyim aser Mapang tatakzük
PRM museum nung yua aliba bener arutsuba mapa ya inyakyim telemsa aika lir aser shisaluyin lena aaika joitepa lir. Item telemsaji yamai alitsü – Lokti anidena densemdaktsüb; terettemji chichi meshia tanatiba kinunger mesura kin bushia jangjatsuba koba dang Provenance Research ta ajar; Naga nunger kin aser lokti aser sobaliba telok balala nungi parnok tebilemba, shisa aser telangzüba temji jungjunga bendena bener PRM dang ya shidakba ozü meyong ta shitettsüsa kumteter kelen meshitsüba; Naga kin aser telok PRM-i oa terettemji jangjashia reprangtsüba aser iba nung ajemdaker jembishinu tejangjaba asen nupurtem rongnung adokdaktsütsüba aser tatemsa terettemji asen limai bener arutsüba temelaba agitsüba.
Iba inyakyim sentong ya kum 8 nungi 15 tashibo sa agitsü. Iba mapa inyaka aodang Naga nunger ajak den kulemi shisa agitepa tajungtiba lemteta, bushitepa, aser nüpurtem nem metetdakja aser temelaba agiyonga aser alima ozüng agi kechi melaa lir iba nung ajemdaker inyaka aotsu.
Iba repatriation inyakyim ya putepshidaktsüba, anebtsüba; aki British nungeri matongmala inyakba tangatetba tasen nung ajemdaker inyakyim tasen purapiteta inyaktsüba itemji tamendakdak asutsü aser talisa sobalibaren aser alima nung tapet ozüng koma lateta ali item dak ajemdaker indigenous nisung indang temeden yua inyaktsü.
FNR Mapanir (Facilitator) ka ama iba inyakyim nung FNR lenisüba nung FNR ajanga lenla sayua Naga nungeri oa PRM nung yua aliba Naga nunger terettemji koda anebalutsü meshia koda kibur kumteta meshia bener asen limai arutsü iba indang koda tajungtiba telangzüba agütsütsü iba nung FNR ajanga anitsü. Iba dak sendakba nung FNR ajanga lokti sabang lapoka arok shisa bendentepa, Naga nunger kin aser lokti tentet, Arogotem aser aser State sorkar den jembitsü.
Iba inyakyim nung Naga nunger ajak anioktsüba, ajaki shilem agitsüba, lokti balala den lokteper inyaktsübaji, aser lokti lenisüba inyakyim ta tangatetba nung FNRi Iba inyakyim koda koba lenla leni lapokdar Iba indang Naga nunger lokti tentet ajonga dang shity zülu nung agütsüogo. FNR shity shir kin teloki sa langzüogo parnok den ajurutepa mensen kaogo aser yamaji ano shir kin nungi sa telangzüba magütsüi ali parnok nungia telangzüba atar.
Kodang PRM nung Naga nung teret indang reprangdangtir, PRMi koka telok indang lir Iba telok den tamasa tongteprateper kechiyong yua aliba terettem kibur bushitepdang item jakzuk tangsem züla züjem takum alirtem parnokji dener meshitsü asünung parnokji Iba inyakyim nung densema alitsüla. Aser kodang telong tenteta junga arudir idangji FNR ajanga Nagaland state government den ajurua asüngdangteptsü aner idangji ano nüpurtem tebilembatema lemsateptsü
FNR-i iba inyakyim ya jenjang aika dang lir ta angateter aser jenjang shia ji loki balala den asüngdangtepa shisa agia jenbishinütepa ajak oktepa masu ka ken ka ken ta inyakyonga aotsü. Iba inyakyim nung kibur ya Naga nunger arok lir ta FNRi jangjajangjaa meteta lir, aser yamaji PRM nung süngden nung yua aliba Naga nunger teretji tarütsü nung koda asütsüla aser koda tembangtsü ta asübajia Naga nungerisa tajungba ka lemtettsü.
Recover Restore aser Decolonise Tentet – RRaD
Asen aki tsüraburtem indang teret dak sendakba nung Inyakyim mapatong balala ajak nung yaria len anitsü atema FNR ajanga Recover Restore and Decolonise (RRaD) telok ka tenteta iba telok ajanga shisa bushiyim akatsü aser Naga kin balala nungi hangmongpi den tongtepratepa shisa agia aser ano nüpurtem den ajurua tarokba bushia nüpurtema iba inyakyim ya koda tongtipang aji metetdaktsütsü.
Aser, Naga nungeri PRM nung yua aliba mangnüngret (human remains) temji meyipa bener arutsu lemtetra, RRaD teloki intaktsübaji joko item terettemji kibur kumteta bushir Oxford University dang meshia zülutsü. FNR teloki Naga nunger Anthropologist ana Dr Dolly kikon aser Dr Arkotong Longkumer, Senior Lecturer, University of Edinburgh, UK, shiba PRM den mapa ka ajanga sentaktepa lir, dena dang RRaD telok nung atentsu teyari meshia mepeshiogo.
RRaD teloki joko iba inyakyim dak sendakba nung mapa aika tenzükogo. Nüpurtem ajurua parnok nungi osang aser shisa tebilemba bendenba, telok balala den sensaksem akaba, shisadokden mensen aliba, ano tasüngdangba balala renemer nüpurtem num aguja langzüdaktsür bendenba; lokti aser kin balala nung tanishir aser lanurtem ajurua tasüngdangba sensaksem akaba; aser noksa, kaket aser sabang O sayubentsü balala ajanga nüpurtem tendakja aser iba inyakyim kechisarena ajonga metetdajka arudagi. Iba RRaD telok ya item mapa inyakyim nung sodaka lir aser ano maneni dang lokti balala shirnoksa iba repatriation mapa linuk balala nung alirtemia inyakdar parnok telok nungia maneni dang shisa agia angazüktsü.
Iba RRaD telok ya tekumkumba, tejangjaba aser nükla ulushia shisa aser otsü bushishir tem bendenloka tejakleni aotsü. Aser FNR ajanga Naga kin lokti tentet balala dang item shisa aser otsü bushir (researchers) nüngtet meshia tongtipangsa Provenance Research (temeden kuli) bushiba mapang RRaD telok den adentsü ajungshiogo.
Naga Lenmang
FNR-ia Naga nunger tensa, tendak balala, tangatetba, otsü oin koda tepolutep lir ibaja rajema lir. Aser item rongnunga asen naga nunger British yimsüsüba küpok aliba mapang tensa tia indang tanü tashi jembir. Kodang British sorkar tera indang jembidir, asenoki tesuiba aser dang tatalokba den medemdangtepa shisaa kaa inyaktsüla.
Tatishitsü agi, FNR inyakyim nükmen – putepdaktsüba aser tanebtsüba mapa inyakba ajanga tangatetba kani aki British nunger yimsusuba mapang asen naga nungeri timtem toushi aser tasüba ajuruba tatalokbatem den medemdangba ajanga tanü tendak tekorem molung anebdaktsütsüba nukjidong asütsüla. Asenoki otsü tatalokbatem ya aki mapang atalokba aser tanü tendak mebendangtsüla.
Iba inyakyim ya, aki British yimsüsüba mapang inyakyim ama masu saka Naga tendak ajemdaker inyakyimji aotsüla. Ajita asünung dang asen Naga lenla lenmang yanglua iba Naga repatriation dang sendak nung tasüngdangba tem balala aser ano British nunger mapang mapa tamajung inyakbatem indang langzütettsü. Anungji, Naga nunger lenla balala nungi shisa molung sadoka lapoker kanga dang chiraha iba Naga lenmangji bushitsüla. Repatriation dak sendakba mapa inyakyim ya aki asen tsürabur teret meyipa bener arutsuba kisüngji masü saka iba inyakyim ajanga asen Naga nunger aki tatalokba otsü ointem ashitsü lenmang lapoktsüla; ano iba ajanga asen sasa aki koda repranga liasu aji melenshir tangatetba tasen nung yangertsüla. Iba Repatriation ya chichiba tetezü jibo obendang, temeden, ayak, akhum, sobaliba, temeshi aser tanela lir. Iba ya asen aki molungsentsü nungi tangatetba tasen lapokba aser ajungketba nuchiso indang lir.
Iba Naga tarutsü lenla lenmangji tekumkum aser teyakyak asütsüla. Iba inyakyim ya kumkum kumkuma asen naga tendak den apet asutsuji tongtipang saka iba inyakyim ya alima ajonga nung koda inyaker aser shisateper item den liromedema asen otsujia alema ajonga inyakyim den atongsemtettsüsa asütsüla.
Onokia iba inyakyim dak sendakba maptem nung olen, ojang aser osep aika Naga nunger asoshi tasen ta meteta lir. Aji saka, ano nisüng arakzüba aser shisatsü adokba ajakya tanü lima nungbo tzü ama yimdaka alir. Aji oda, kecha lokti mesüra shisaliok angazükdak tangar dak nungi alaka balaka benzüka mali mesüra ojang oren par kisüngi mekaa meyutet. Anungji, ojang oren temji alima rangpen asoshi süaka, item ojangtem pei pei tensa, tendak, otsü aser jakla libaliro sobaliba dak ajemdaker item ojang orentem angajema benshir.
Tarütsü lenla (pathway) yangertsü asoshi FNR aser RRaD telokya Naga nunger arok shisa, otsü-oyim (narratives) aser jenjangtem medemdanga asen lokti balala nungi shisa tasen angazüka asen Naga nunger lenla chitettsü.
Longleng nung tain kati RRaD telok dang yamai shia liasü: “Kodasur asen tetsü tebou nunger teret museum nung sayaa yur tesünep nung alitsü. Parnok tanüji kanga tipmetemi alitsü.” Asen tetsü-tebou nungji museum nungji sa süngden nung ayu tajungba asü asen Naga limai meyipa bener arutsü iba telemtetba jibo asenok Naga nungerisa koba tajungba aji shisadnga lemtettsüla.
Sentongnir ka ama, FNR teloki lokti balala den jembishinütsu akatsübaji lapoktsür. Aser iba inyakyim külemi tejakleni aotsu atema nüpurtemi pei pei tebilemba tajung aser mabensabatem rakpoka lemsateptsü lapoktsür. Talisa mabensabatem kechisarema ajonga kija dangi iba Repatriation inyakyim mejimenenja mangatettep adokdakja masü saka indang indanga FNR den lemsateptsü mepeshir.
Issued by:
FNR (Forum for Naga Reconciliation)
19th May 2023
