Translated into Liangmai Naga (Lianglad) by Dr Hunibou Newmai
FORUM FOR NAGA RECONCILIATION
(Naga maitu Chawi Thiukhaibo Phom)
Naga mai poupe gu masiak bambo tapii phung malanbo
Duonsuh raibo
Naga mai tu Chawi Thiukhaibo Phom (The Forum for Naga Reconciliation: FNR) naii Pitt Rivers Museum(PRM) khaddi University of Edenburgh naii University of Melbourne gu Naga Researchers dung arounglu sangdiu lam shaikhai mibo Naga poupemai gu taphau-tapii ‘Museum’ ga khai maduih bambose pasaih dethak thiuralo chiwbo lam ga madin thiujiu bamme.
Haichiwjiu, COVID-19 raren wangbo gasu haibo katinghmai taphau-tapii dung ‘museum’ ga khoilen khaibambo baam gasu juu nbai mibo lam ga PRM niu 2020 kum N’gianhiu jengtung 22bo naih madin thiura npuih lekhai lande. Haijeng niu kakahmai niu mawangg kindau aliu Nagamai katinghmai gu taphau-tapii paliu gu ‘Museum’ ga khaimadui bambo lam ga dechiw siak ralo chiwbo lam ga makhiam minjiu makhiamra pageng bammide. Sichiwjiu, katinghmai 214 kuumbo gu taphau-tapii, paliu thamh, khaddi katamh taambo Museum gu takuk, maksai nbungg ga khailu nkhih khai bambose dethak kamlu paliu poupe ramlam phung malanlu nkhih khailan ralo chiwjiu makhiam bamme.
Naga maipui Dr. Dolly Kikon, Associate Professor, Melbourne University (Anthropologist) niu ga PRM niu takiuh bambo cham ‘The Guardian’ chiw kuhbo pawan cham ga ken taulu Museum gu Director tu haibo Nagamai gu kashaibo taphau-tapiise nkhih rabo lam ga maniu khaide. Haibo PRM ga khai bambo charaa-ruangh lam ga pah niu FNR gu kadin-kafaa mainaii makhiam thiude. Sichiwjiu, PRM niu alamh wangbo ga FNR niu manangh-takiuh khaibibo pien niu chawi thiulanlu kashaimai gu taphau-tapii dungse aliu Naga mairam lam phung malan raleng pathiak hina makhiam aruonglu kawi thiu wangra kam bamme.
PRM niu FNR tu majang tatien thiu aruong khainibo maduhjiu dinne, “FNR niu Naga mai kakga kawi thiujiu, kuok khaibo, katingh kien lamsuh kikak kam masha mibo hinase ju aruang khailanra mataan kinbose praa kathiubo khatle chiwbo aliu niu silu weh. Sichiwjiu, Naga mai gu tachengh saih swijiu katinghmai, kadin-kafaamai khaddi zad gu malin ga tatien thiu kinmai mathiu niu makhiam thiulu katingh maigu charaa se malan kajihbo khaii ga malan khaimira khengbo weh.” Haikumbo praa kathiubo tienkaam ga PRM niu ka-masenhbo sera khat niu khat gu kasuonbo silu, katingh mainiu kamtom kampai mibo pakhiangna kuak khai arijiu lungchun ga taphum khung makjiu maduh laangjiu kawi thiujiu kikak kashabose kam mahah raleng nge.
Tenkiu rabo pathiak naii pawan
Pawan ngutjiu bamdi katinghmai gu taphau-tapiise dechiwbo jaiga kalan khairalo chiwbo pathiak phui minjiu phuilu tenkhai raye. Katinghmai gu taphau-tapiise, ndebo zad ga sulo maksai, saoram ga niulo, maksai saoki mailo chiwbo phiu minjiu phiulu dihthin chengh ga raodia kasuibo pakhiangna raokhailu malan raye. Haileng jengniu, charahcham di phiu minjiu phiulu mathiu niu suide chiwbo khaii ga malan khairaye.
Haichiw, palam phiu minjiu phiusai tingkum 8-15 kuumbo ngutbodi suiye. Haibo lam ga kam masanra mataanbo ga Naga mairam hina ga tad ruonjiu azad-aziuh maidi joujiu ‘community engagement, participatory research’ kamradi kengjiu bamme. Nkiujiu, haibo lam ga katingh-naa mathiu tu pisikhaira pageng di bamme; sigasu pachat taam taamjiu lungkinbo zad gu dihthin chengh hinadi kam masanra pageng bam suhne. Sichiwjiu, pajaih majibo gasu khat khat chunsiet kamkhai mibose kuok khaijiu dihlung maigu tachengh-tajaih hang ga chakhuangh thiukhaibo sedi kamra pageng bamme.
FNR niu kam tathui khaira
PRM niu masenbo sera FNR tu pijiu Naga mai mathiu tu palam pisi masan khairailu tuhoi Naga mai katinghmai gu taphau-tapii ‘Museum’ ga khai madui bambose Naga mai ramlam dechiwbo jai gasu malan khaimi ralo, maksai dechiw nkhih mawi sanlu ralo chiwbo lam gaye. Haileng jeng gasu Naga tribe hina gu Bowdii, phumling khaddi Nagaland Government tu di makhiam thiu mawijiu makhiam thiu raira pageng bamme.
Haibo lam ga maihina simawijiu silu palad khai kaji hina khailu chunkhat thiujiu tenlura FNR lamsu Naga gu Bowdii mathiu leng chalad pisi khaiye. FNR niu din kasuibo maihina ga din khailu paliu gu machun chamkak makhahbo phom hina niu di jijiu chamkak khaira khuon bamme. PRM gu kasuibo hang ga sangdiu lam shaikhai mibo maigu taphau-tapii dungse paliu kaikik dung niu khoi suira FNR niu Nagaland Government tu di alamhlu mathiu niu masenbo dinkhai raye. FNR niu haibo lam ga npao kasui maihina tu npaolu Naga mai sangdiu lam shaikhai mibo taphau-tapii dungse paliu taa-nahmai niu simasan lubo naihsu pasai dechiwbo jai ga akhih khairalo chiwbo laamse din masan khai raye.
FNR niu khit khit jiu paphom katamh taambo kakeng tu di alamhlu madin thiura pageng bamme. FNR niu ra haibo Naga mai poupe gu tapii dungse saoniu lusiak ralo chiwbo phiumasan padlubo saih niu pakhaii kajibo ga nkhi khaimira chapkhai suhne.
Recover Restore and Decolonise Team-RRaD
Shaimibo katinghmai taphau-tapii nkhih madio khaira jeng niu haibo RRaD phom hai FNR niu som khaibo weh. Haibo lam ga phiu masan khaira Naga maigu kasi-ka’ngaoh mai kengjiu pijau khailu maihina simasan diangra karambose haibo phom gu machunne. Naga mainiu ‘taphau-tapii’ lura masenhsai RRaD phom niu University of Oxford gu dihthin jai hang ga alamh kasuibo alamhlu pi tathui khaira mataan raye. FNR niu Dr. Dolly Kikon khaddi Naga Anthropologist Dr.Arkotong Longkumer, Senior Lecturer, University of Edinburgh UK tu alamh khaijiu PRM naii RRaD tu aruanglu palam hina kam madio khaira dinkhai bamme.
RRaD phom niu ten kasuibo tienduon hina tenjiu pageng kabambo chalad-chalui, maniu kasui maiga maniu, adaoh kasui maitu adaohlu, sigasu madui kuhlu makhiam aruanglu ariak khuongdi raopad suhjiu bamde. RRaD kaangh ten kasui hina tenlu katinghmai gu taphau-tapii dungse phung malan lan raleng npuih phiujiu bammide.
RRaD kaangh mainiu research thiura chamai kengjiu khaisanlu tatien maranhjiu tadkiu bamde. Sijeng niu, FNR phom niu Naga tribe gu Bowdii khaddi paliu gu kadin-kafaamai hina tu haibo lam ga phiu masan padra RRaD tu alamh khaira dinsan khaiye.
Naga maigu Ngiuduon (A Naga Pathway)
Naga maigu lunlung kawi-kasha lam ga FNR niu di sibamme. Naga mainiu zad katamh mai hang ga lungbo gu pathaat di sijiu bamme. Maizad hang ga lungbo gu pathaat silu taduonh-tanuu leng di makum katinlu tatien thiura pageng bamme. FNR niu maihang ga lungbo gu pathaat, tathiu-charii thiubo gu ka-nchuumbo, mipum naii lungchun chariuhbo pakhiang nase kawi thiulu kam mahah mibo gu pageng sisanjiu bamme. Sichiwjiu, poupe kien naii tuhoi kien ga lung bambo aliu gu ka-alamhbo ryang se aliu niu kam tap silakge.
Naga maileng thiujiura haibo taphau-tapii kalan khaibo ngamkaam hai khenrang thiu ncham mibo gu madanh khatle. Haichiwbo jai gasu ronna Naga mainiu katinghmai taphau-tapii kalan rabo lam ga kam masanlu buiye. Sichiwjiu wah ka-mahinbo hahjiu maihina aruonglu phiu masanra pageng bamme. Taphau-tapii phung malanbo hai aliu poupe mai phauh pakhaii kajibo ga khailanbo ronna makge, chiwdi dechiwbo jai gasu haichiw padmilo chiwbo lam ga pasaih taduon-tanuu leng di kam madio lujiu wahina ga sisanlu raleng nge. Tapii malanbo gu praa kathiubo sera maikhat niu daoh buibo majih, pazad palun sibo, chamai khat niu khat tu chakhuangh thiubuibo, zad khat gu talungh, rahchengh gu masanbo khaddi hiunah lam ga makum sanlura leng nge. Haibo tienkam siniu lungchun ga khenrang thiujiu maihang ga bam tahra mataan rabo tienkaam khatle.
Naga maigu lunlung hai khengsibo naii taan-hujiu maitu asunh raleng pageng bamme. Nkiujiu, haibo taphau-tapii phung malan rabo lam ga palam hina ga makhiam thiu mawilu kadiri gu tachengh-tajaih saih swijiu pijiu tathui khairaye. Kadiri gu thiujiu taphau-tapii malanbo jai hai aliu Naga maileng ra wah ka-tasan kumjiu lukhaidi lubuiye. Aliu chamainah naii aliu gu tasii kadiri ga mwi khangh bambo hai pariak chaksi lakge. Sijengniu, zad khat niu di, maksai tasii katibo pakhak taam taam bambo dung niu di khat khat tu alamhmak jingjiu lungsi lakge; sikuumjiu mai kasia gu makuum ronna majide chiw lukhailu thinpyiu daoh lakge.
FNR naii RRaD niu Naga maigu lunlung kawibo, ningting, tasii, lam ga maizad katamh maiga suh niudi katisanlu Naga mai tu ju aruanglu ten nchamra munranhjiu tadkiu bamme.
Longleng nam ga bambo katinghmai khat niu haichiw RRaD kaangh ga dinne, “Dechiwjiu aliu poupe maigu hiunah niu paliu gu taphau-tapi mathiu phuira leng kybeng ga denkhai bambo tu masenh ralo? Paliu hiunah hai wah daodi agyi-manaaijiu bamlakge.” Naga mai gu taphau-tapii dungse PRM kaangh mainiu nbungg lung ga nbaikhai bam tajut rama, maksai padi-param lam phung wanglu pakhai kajibo ga nkhi khaimi rama chiwbose tuhoira Nagamai mathiu ben ga bam mide.
FNR niu ra haibo lam ga chalad madin thiura kagauh khaibo weh. Sijengniu, naliu gu machun kawibo khaddi pageng kabambo hina pikhaijiu tatien ten machamra kathot khe. Naliu chunsiet lad bidi geng rabo ladbam hina sira FNR ga din khaira mathiu khu ga kheng khaibo weh.
Janpad khaibo:
Forum for Naga Reconciliation Jengtung: Karamhiu 19. 2023
