Translated into Nthenyi language (Rengma) by Zhükemilie Kechiwa & Hichulo Semy
Forum for Naga Reconciliation (FNR)
Naga llamiethu aghügghi senghule kesa atengtie ghena zhükechi.
Atujüü
Forum for Naga Reconciliation (FNR), Pitt Rivers Museum (PRM) nuo Naga Bhaneng (Research) thuna University of Edinburgh nuo University of Melbourne gwighinuo Phanshü (museum) wie Naga llamie tsaqe saghuo ketheng haa khaatienuo noccayabenkhe tsü ketenkessha benle.
COVID-19 yyidhagha ghena asha 5 sengwie, mazüsha 22. 2020 PRM shaakechi wie mathuna ani ghügghi pie nu ccücaketheng penwietsü kkhupie thengssha. Mathu kemeshen walethuo Britain ayyi kepapa wie ketie kesatsü wie ani ghügghi saghuo ketheng tsü kkhupie thuthunikhe cünengtendhale saben. Naga ghügghi lelaa saghuopie akhidson kepapa kesawie saghuopie theng dha. Ciwie Naga llamie ghügghi 214 na ben. Aghügghi nuo aliessen thuhaa phanshü wie ben.
Dr. Dolly Kikon, Naga Anthropologist, Melbourne University wie Associate Professor. Ma The Guardian jjüwa (News) wie haa cüükie sikeya wie, PRM kempfüwa (Director) wie haajjügihaa keghüüche.Tsüsengwie ma FNR thulaa ccünengche. Tsüsengwie PRM thuna haapiella khaatie sanuo kesa FNR thu ssinuo keccünenglie sshughu. Tsü keccünenglie keyasengwie FNR thuna Naga miezza tsüdiwie haathu haapie khaatie satenkhe keccünenglie sshughu bendha.
PRM thu kekhina FNR “ mexhienengkeya, kesami kedisshülie, saghuonengkeya keketen, ayaajü kegulli keketen, haathu kegulli haa ghangpie nenle.”khiche. Aghüccülelaa kegulli haatie kesa Naga keqhie thu,alie kesa thu, ahuo thu gwighinuo aghügghi thuhaa mexhiedsü nocca pie thengya mexhiele khiche. PRM thu khineng kechina, mtsüücchu (strategic) ketenkessha keben haawaha khienie ayaajü ayyisüyigha keben thu tsüdilaa gwighinuo ajüü keyalie wiena gwighi kemexhie senghuya mexhiele.
Satu kebenjü
Allamie ghügghi pvüphieghie kesahaa ayenllen kejon wie nsathuo yishüben. Ani tengtie, chüthaa kesa, bhaneng kesa, (dighadsan nithu, akhang kepapa kesa thu, amiezza thu, mapvüü thu) Naga gaxhangyen, shenchi thu (official), adhighie thuwie ncchan-ntsa chükeya, haapie ncchan-ntsatsi (documentation) nsathuo yishü ben. Naga miezza kepapa kesathu PRM xxhinan waanuo llamie ghügghi xhiedsü ghan nchithuo keyishü naben. Tsütienuo sennenghu keya nsathuo yishü.
Haa salekesa amahpi 8-15 yaya mexhie. Haa sakewaawie tsüdilaa bhaneng wiehaa gwenghenghuo (participate) nuo nsathuo yishü. Apen wie waa, ghizzaghitie chüketsü, ajüüyya kemecci nuo ayyi tsüdi yen kenie wie nbenthuo yishü. Haa sakewaa wie gwighi kemexhie, gulli keyie, kekhenkeghi nkemi, gaxhangyen senghu wwakeya nuo ahuo yentsü senkemexhie sanuo nsathuo yishü.
FNR Llensani (Facilitator)
Naga ghügghi bhanshü wie kebentsü senghule kesaliena PRM thuna cikechitie FNR thuna allen kesani saben. Haa ghena atusalla keccünenglie, bhaneng, Naga tsüdi, amiezza kepapa tsüdi, dunkwen zillashü thu (civil society), kemehu thu,nuo Nagaland Kidhan tsüdi gwighinuo nsathuo yishü.
FNR thuna shenchi llesü zhüpie Naga miezza kemesshü tsüdi cüdha. Miezza kejonna llesü sapie nuoneng chikesathu kejonlaa meduchidha nuo hielaa kejon medule saben.Aghügghi haa senghule kesaliena PRM na adhighiethu kejonlaa nsenthuo yishü ben. FNR thuna anithu kemeshen tsü kkhupiella Nagaland Kidhan kezachi ben.
FNR thuna chükebenlethuo, kegulliha azillashü kepapa kesa ssinuo ashina salla keccünenglie nsathuo yishü ben. Naga ni thuna Naga ghügghi haapie khaatie satenkhe naga thuna chüben.
Saghuoneng kesa zithu (Recover Restore and Decolonise Team) RRaD
FNR thuna Naga ghügghi thuha saghuo pie theng-a le kesaliena Agikkha (team) kesü piekitheng. Haathuha waalla ahuothu gwighinuo haa cüükie hasi nuo bhaneng pie atengtiewa chütsü kesatsü saben. Agikkha thuna haa mexhiedsü bhakekaketsü sasenwaalla University of Oxford wie shenchi yen wiena khiele saben. Dr.Dolly Kikon, Dr. Arkotong Longkumer,Anthropologist,University of Edinburgh.UK mani haa PRM ssinuo mexhiedsü
Kecchülie ben. Tsaliena agikkha thu haa ssinuo mexhiedsü kekeqalie chilo kezaben.
RRaD kegulli kejon sasshughu dha. Chütsü kepapa kesa, nu ssinuo keccünenglie kesa, kemtsü keketen,meghieku (workshop),kekeghüülie, accülie kesathu kemedu, PRM wiena ghayentsi (video), ajüü khipie nu kegiza nuo llesü zhüpie keshüü chiben. Aghügghi haa pvüghule kesaliena, agikkha thuna azillashü kepapa ssinuo keccünenglie sshughudha.
Naga llen
FNR thuna Naga llamie cüükie kepapa kesa haa meshenpie lleben naa ben. Naga zandhi kepapa (decolonize) sakesa haa kemeshen khielielaa ithu nieden. Zandhi kepapa sakesatsü nuo khielie gaxhang khaatie benkhe haa chümeyathuo yishüben. FNR kegulli sakewaa wie chükeyalethuo zandhi kepapa kesa cüükietsü meshenpie qqhecüshaghie ben. Qqhecüsha kesa gaxhangha sapfüneng pie mexhie meyathuo yishü benle. Ithu khienie cüükietsü malinuo kegulli saya nben.
Naga hhisha wielethuo kkhunengsenghule kesa haa zandhi kepapa kesa wietsü kakinuo nsathuo yishü ben. Tsütie salethuo ciwie ccüna Naga llen tsü nieya mexhie. Tsütie salethuo lleben shaapie kecülienuo ayen kenie wiena gulliya mexhie. Senneng gughu haawaha senghu mapen wie mexhiedsü thengya dhale kesa ketan neng isalaa ciwiena ithu cüüki tsü khipie nu kezaya mexhie. Tsütie salethuo ithu ketanlaa ithu chüyya nuo kesüsü cüükie kechülieya mexhie. Khiwaalethuo haa atsentsa, kemeshong, atsi (identity)keniquo, llamieyen, kemethaa nuo aghamuo llen wie lelaa kechüliekeya kegulli. Haawaha zandhi ketheng kegulli tsü sapfüneng ya mexhie.
Naga llen haa dsadsa nsathuo yishü. Dsadsa kesa tsüpie kepalelaa kemeshikilie, keccünenglie nuo ayyi kepa wielelaa saghuonuo haa senghuya kemexhie nsathuo yishü. Naga banhan tuwielethuo haa senghulekesaha kethüüghü kesü saben. Chükeben kesülethuo guwwha guwaa nuo kechükeza haa khiya ghashennen wa jidha. Tsaliena amiezza kesülekesü lelaa maketan ma kemeshen sale kesa dhudha. Haasale haasalelaa ma gaxhangyen, majjügi, sakenan thuha mexhiedsü yaatantie salla khienie khaatie xhanghu nuo khielie khaatie xhang benkhe tsü keniewietsü bennuo kemexhiewa kessiyanuo n-gulli thuo yishü.
FNR nuo RRaD thuna Naga kemetsaa, gaxhang cüükie amen kebenthu haapie atongtie salla kegulli saben. Amiezza kepapa tsüdi haa chüyanuo tsüpiella Naga llen sayaben.
Longleng wie ani keqhieni kesüna RRaD gikkha thuwie kegizalethuo “Llamie thupie Phanshü wie haki thenglethuo khaatienuo lleben ccaya bennuo? Mathu ghamuona ccen-e benya nben.” Pie PRM kwen wie thengle, senghulelaa tsa Naga mihwie ben. Llensani kesaliena FNR thuna nu ssinuo keccünenglie ben. Ithuna khinan keben walethuo kemexhiewa salekesaliena khiketenthu gwighinuo gulli waaden. Kepachithu tsüdilaa qqhu-o piella FNR cüchuokhe ani ghangnuo khi nuo zhü nsalaalo Naga mexhieyale kesaliena.
Forum for Naga Reconciliation.
Atsathang
Xhaanuowenkepvüsha 19.2020
(May 19. 2020)
